ភ្នំពេញ៖ នាយករដ្ឋមន្រ្តីប្រទេសស៊ែប៊ី លោកស្រី អែនណា ប្រណាប៊ីក (Ana Brnabić) បានផ្ញើសារលិខិតមួយចូលរួមអបអរសាទរជូនឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត សម្រាប់ការចូលកាន់តំណែងជា នាយករដ្ឋមន្ត្រីថ្មីរបស់កម្ពុជា។

សារលិខិតអបអរសាទររបស់នាយករដ្ឋមន្រ្តីប្រទេសស៊ែប៊ីនៅថ្ងៃទី៣០ ខែសីហា ឆ្នាំ២០២៣ បានឱ្យដឹងថា៖ «ស៊ែប៊ីបានប្តេជ្ញាចិត្តយ៉ាងមុតមាំក្នុងការធ្វើឱ្យកិច្ចសហប្រតិបត្តិការកាន់តែស៊ីជម្រៅជាមួយប្រទេសកម្ពុជា ហើយខ្ញុំត្រៀមខ្លួនជាស្រេចក្នុងការរួមចំណែកផ្ទាល់ខ្លួនដល់ទីបញ្ចប់នេះ»។

លោកស្រី អែនណា ប្រណាប៊ីក ឱ្យដឹងតាមរយៈសារលិខិតដដែលថា លោកស្រីមានសេចក្តីសោមនស្សរីករាយជាខ្លាំងដែលរដ្ឋសមាជិកអាស៊ានបានទទួលស្គាល់នូវចំណាប់អារម្មណ៍យ៉ាងខ្លាំងរបស់ស៊ែប៊ី ក្នុងការទទួលយកសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ហើយខ្ញុំជឿជាក់ថា ទំនាក់ទំនងរវាងប្រទេសរបស់យើងនឹងបន្តពង្រឹងតាមរយៈកិច្ចសហប្រតិបត្តិការលើគ្រប់វិស័យក្នុងអាស៊ាន។

សារលិខិតមានខ្លឹមសារថា៖«យើងមានមោទនភាពចំពោះទំនាក់ទំនងមិត្តភាពជាប្រពៃណីរវាងស៊ែប៊ី និងកម្ពុជា ដែលមានតាំងពីការបង្កើតចលនាមិនចូលបក្សសម្ព័ន្ធ ក្នុងក្របខ័ណ្ឌដែលប្រទេសយើងទាំងពីរបានសហការយ៉ាងជិតស្និទ្ធ។ ក្នុងន័យនេះ ខ្ញុំប្រើប្រាស់ខ្លួនខ្ញុំផ្ទាល់ក្នុងឱកាសនេះ ដើម្បីសម្តែងការដឹងគុណយ៉ាងជ្រាលជ្រៅចំពោះជំនួយដ៏សប្បុរស និងការគាំទ្រដ៏មានតម្លៃដែលព្រះរាជាណាចក្រកម្ពុជាជាមិត្តបានផ្តល់ដល់សាធារណរដ្ឋស៊ែប៊ី ក្នុងដំណើរការអនុម័តសន្ធិសញ្ញាខាងលើ»។

ជាមួយគ្នានេះ នាយករដ្ឋមន្រ្តីស៊ែប៊ី បានគោរពអញ្ជើញនាយករដ្ឋមន្រ្តីកម្ពុជា លោក ហ៊ុន ម៉ាណែត ឱ្យទៅបំពេញទស្សនកិច្ចនៅសាធារណរដ្ឋស៊ែប៊ីក្នុងរយៈពេលខាងមុខ ក្នុងកាលបរិច្ឆេទនៃភាពងាយស្រួលទៅវិញទៅមក ដោយបញ្ចាក់ថាជំនួបនោះនឹងក្លាយជាឱកាសមួយដើម្បីជួប និងផ្លាស់ប្តូរយោបល់អំពីលទ្ធភាពសម្រាប់ការលើកកម្ពស់កិច្ចសហប្រតិបត្តិការបន្ថែមទៀតលើគ្រប់វិស័យនៃផលប្រយោជន៍ទៅវិញទៅមក៕